الاقامة في تركيا

كيفية الحصول على اقامة في تركيا:

بص يا سيدي سيبك من النصابين وبتوع التلت ورقات اللي على الارصفة خاصة في تقسم و اكسراي او مكاتب السياحة المضروبة (اللي هانزل قائمة بأشهرهم قريب) وخليك معايا وشوف الموضوع بسيط لدرجة ايه:

1- تروح للـ Noter دي مكاتب زي الشهر العقاري في مصر كدا بس طبعا على نضيف جدا وبتلاقي هناك موظفين غاية في الشياكة والادب والاناقة والتعاون لدرجة انهم ممكن يعملولك شاي (ببلاش) . . اه والله شربنا هناك شاي ببلاش 
مكتب النوتير دا بيعمل ايه .. بيختم ترجمة جواز سفرك وغالبا بيترجمه ويختمهولك في نفس الوقت والاتعاب 100 ليرة .. انا عن نفسي دفعت 90 ليرة وشربت شاي 

واحد هايسألني ويقولي يا كابتن لطيف وفين مكاتب النوتير دي .. !!
دا سؤال لطيف .. دي يا سيدي خريطة بكل مكاتب النوتير في تركيا شوف اقرب مكان ليك وروحه
http://www.tnb.org.tr/Harita/noterlikharitasi.html

تمام .. بعد كدا تورح تتصور في اي ستوديو بعشرين ليرة

تمام .. بعد كدا تروح مديرية الامن .. بس ماتدخلهاش .. هتلاقي كشك كدا ادام مديرية الامن واقف ادامه ناس كتير من جنسيات مختلفة تروح تقف في الطابور وتطلع المستند اللي تمت ترجمة جواز سفرك عليه وتصورة صورتين
اكتب على صورة منهم اسم والدك واسم والدتك ورقم تليفون للتواصل (مش شرط يكون رقمك) وممكن يكون رقم صديق ليك بيفهم تركي لانك كل اللي هاتعمله بعد كدا انك هاتدي الورقة دي للراجل اللي واقف في الكشك ومعاها 30 ليرة وبعد ساعتين هتلاقي التليفون بيرن ويقولك معاد مقابتلك للحصول على الاقامة .. عدي عليهم تاني يوم او بعدها بيومين خد المستند بتاعك اللي فيه كل تفاصيل المقابلة

طب والصورة التانيه تعمل بيها ركز معايا .. خليها معاك يا برنس احتياطي

المقابلة عادة ونظرا للضغط على موضوع الحصول على الاقامات ممكن تبقى بعد شهرين انا مثلا معاد مقابلتي في يناير الجاي

بالمستند دا تقدر تمشي وتعيش في تركيا عادي جدا لانك كدا بتسعي للحصول على اقامة

كدا يبقى 100 ليرة نوتير + 20 ليرة تصوير + 30 ليرة الكشك يبقى الاجمالي 150 ليرة وشكرا

ولما اروح في يناير القادم ان شاء الله واكمل اجراءات الاقامه هاقولكم عملت ايه بالتفصيل

انتظرونا ولا تنسونا من صالح دعائكم